Nikan namechkawilia se tlayehyekolli (pensamiento). Onikahsik ich Internet se página tlen kipia Biblia ika nawatlahtolli. Ika yolkokolistli nikitta nochi tlen omonawatlahtolkueptok ich Internet kahki cristiano, católico, iwan ihkon. Inin cristiano tlaneltokalistli tlen techtlapowia den se teotl tlen omik, kahki pinotlaneltokalistli tlen okiwalwikahke kaxtiltekah pinotlakameh. Inin tlapowalli techilli ma titlahyowikan nikan tlaltikpaktli, iwan san tipaktoske satepan timikiske. Ahmo nikualitta inon. Ahmo no okikualittahke toachtotahwan. Moneki tipaktoske nikan tlaltikpaktli, moneki tikmalwiske tonemilis, tochanehkawan, tokuawyo, totlalnantzin, toeheka, toatzin iwan nochi tlen chanchiwa nikan totlaltikpak axkan. Pinotlaneltokalistli techilli ma tikilkawakan wewetlahtolli tlen otechkahtewillihke toachtotahwan. Xikilnamikikan inin amoxtli itoka biblia okihkuilohke europeos, wan yehwan okimiktihke miake tlakameh iwan okipolohkeh miake altepeme para kinmakaske inin tlaneltokalistli in ihkuak kinkuiliayah intlal. Nomasewalikniwan, amo ximokahkawakan, amo xikneltokakan inin pinotlaneltokalistli. Tikmakixtikan tlen nelli totech powi. Ahmo xikilkawakan Kuawtemoktzin, Moteuksomatzin, Kuitlawaktzin, nochtin oselotlakame iwan kuawtlakame, iwan nochtin akimeh okinyaochiwilihke kaxtiltekah. Ahmo xikilkawakan Sitlalmina, Itzkoatzin, Tenochtzin, Xelwantzin, Se Akatl Topiltzin. Ahmo ma xikilkawakan totoltekayo, Ahmo ma xikilkawakan Ometeotl Ipalnemowani, Miktlanteuktli iwan Miktekasiwatl, Tlalokan Tata iwan Tlalokan Nana, Ketzalkoatl, Mixkoatl, Teskatlipoka, Tzonkoltzin iwan nochtin teteoh tlen totech powi. Ayakmo ma tiktokakan se pinoteotl tlen miki iwan kimaka mikilistli. Se pinoteotl tlen iteopixkeh kipia miak tomin, nochi tomin tlen otechichtekilihke. Ma tikchikawaltikan tlen nelli totech powi.
