Onikahsik se blog tlen kipia tlahkuilolistli ika nawatlahtol. Onechpakti miak kemman onikittak pampa kipia tlatlamantli tlahkuilolli. Kipia xochitlahtolmeh, kipia tlakuikameh, kipia tlapowaltin iwan oksekimeh tlatlamantli, nochi ika nawatl.
Nikihtowa inon kualli yetok, iwan moneki se kichiwas okachi. Moneki tikihkuiloskeh oksekimeh amameh kemeh tlahkuilolistli kampa weyi tlamachtiloyan. Nikihtowa kualtis titlahkuiloskeh temas académicos iwan filosóficos, iwan tlatlamantli. Axan, miakeh kiyehyekowah nawatl san welitis kihkuilos xochitlahtolli iwan tlapowaltin. Motta kemeh nawatl amo kualli pampa oksekime tlamantli tlen okachi ipati. Inon, amo nikneltoka.
Nikihtowa kualtis titlapowaskeh ika totlahtol nochipa, nowian iwan nochtin tlamantli. Nikihtowa kualtis titlahkuilos ika totlahtol nochipa, iwan kualtis tikchiwaskeh amoxtli iwan amameh. Nimechyolewas nochtin amehwan akimeh antlapowah totlahtol, ma xitlahkuilokan ika nawatl. Amo nikahsikamati tleika miakeh kihtowa nawatl kahki "oral" iwan pinotlahtol kahki "lengua del conocimiento". Nikihtowa inin tlahtolli noihki kahki se ixtlamachilistlahtolli. San kemman se kihkuilos ika totlahtol, tipewaskeh tikchikawaltiskeh totlahtol. Amo ma timoilpitokan ika pinotlahtol.
Tla amo tikmati yektlahkuiloltlanawatilli, amo ximotekipacho. San yolik tinehnemiskeh. Ihkon opano ika nochtin oksekimeh tlahtolmeh. Ye wehkawitl amo onyetoyah yektlahkuiloltlanawatilli ika español, noso inglés. Iyektlahkuiloltlanawatilwan oneskeh kemman tlakameh opehkeh tlahkuiloskeh. Ihkoni, tehwan moneki tipewaskeh titlahkuiloskeh iwan tikamapowaskeh. Xitlahkuilokan kemeh kisas. Satepan, san yolik, ankitzikoskeh kualli yektlahkuiloltlanawatilli.
